أكيد سمعت عن الـ Ultrasonic sensor قبل كده ;) ;)

بس احنا مصممين نكتب بوست ونتكلم عنه وعن الحاجات دي :

- ايه هو الـ Ultrasonic sensor ؟ :)

عبارة عن سنسور بيقيس المسافة بينه وبين أقرب حاجز يقف في طريقة

- حلو..طيب بيشتغل ازاي ؟ 

بص يا سيدي السنسور ده فيه فتحتين زي اللي في الصورة كده واحدة منهم(اسمها Trig) بتطلع موجات صوت بتفضل ماشية لحد ما تلاقي حاجز في طريقها ... تقوم موجات الصوت تخبط في الحاجز وترجع للفتحة التانية للسنسور واللى اسمها Echo 

ايوه طيب استفادنا ايه لما الصوت خرج من السنسور ورجع تاني !! o.O 

السنسور بقى مبيسيبش الصوت يروح ويرجع بمزاجه كده :) لأ ده بيحسب الوقت اللى الصوت خده من أول ما طلع لحد ما رجع يبقى انت كده معاك الزمن (t) 

ولو انت بتسخدم السنسور ده في الهوا هتبقى عارف ان سرعة الصوت في الهوا 340م/ث تقريبا 

يبقى انت معاك سرعة(v) 

واحنا بندور على المسافة (x) !

نروح بقى لقانون السرعة= المسافة ÷ الزمن 

ونقول ان x=v*t وبالتالى نقدر نجيب المسافة بسهولة طالما معانا الزمن بالظبط 

بس متنساش ان الزمن بتاع الصوت من أول ما يخرج لحد ما يرجع لازم نقسمه ÷2 ;) ;)

موضوع سرعة الصوت ده متشيلش همه لأنه جاهز بمجرد ما تستخدم Ultrasonic.h المكتبة بتاعة السنسور وبتخلي كودك سهل جدا 

السرعة مش هتضطر تكتبها في الكود الا لو اشتغلت من غير الـ library.